الزكوكية ... أسلوب الحياة

اليوم لمحت عيناي الجميلتان واحد اللقطة بإحدى شوارع إحدى الأحياء الشعبية بالدار البيضاء 
لقطة من اللقيطات لي كيخليوني نتأمل ف طبيعة الكائن المغربي ونطرح على راسي السؤال واش فعلا عندنا كائن مغربي ؟ أكيد لا عندنا أصناف وأشكال وألوان من الكائنات المغربية 
فلو كان عندنا كائن واحد ولا صنف واحد من المخلوقات بطريقة موحدة لكنا بخير وكنتفقو على اغلب المسائل لي كتخصنا ... ولكن العكس هو لي واقع حيت مع اختلاف أصناف الكائنات كتختلف المصالح ثم تتفرق المطالب ... لمهم ماشي هدشي علاش باغي ندوي خليو هدشي تانرجعولو منبعد
اللقطة اللي صنعت الفارق وخلاتني نخمم تحت ديك الطنطونة ديال الشمس لي كانت اليوم ... واحد الولد قاصر جايب بلاستيكة ديال الزبل قاطع الشانطي على أساس يلوحها فالبركاصة وكنت كننتظر منو يلوحها وسط لبركاصة لأان البركاصة أولا خاوية , ثم المحيط لي ضاير بالبركاصة نقي يعني غايجي حداها ويدير حركة بسيطة وهاهو حافظ على نظافة الشارع ... ولكن الصدمة هي أنه تا جا قبل مايقرب للبركاصة وهو يلوح ديك لبلاستيكة غير حداها ومشا راجع فحالو بضمير مرتاح كيقاد فالتشويكة وكيشوف فالسيرفيط واش مكوكسة والسبرديلة واش ممسوحة
فهاد اللحظة بديت كنخمم فهاد النوع ديال البشر لي عايش معانا فنفس البلاد ونفس المدينة لي جامعة عدة انواع ديال البشر مبدلين عليه , لقيت ان هاد الدري الوسط لي عايش فيه بووحدو كيشكل واحد العالم مختلف هو والناس لي محيطين بيه ... كون على يقين ان هاد الساط مغايقراش هدشي لي كتبت ومعمرو غايوصل ليا ( زعما باش يأجوتي الكونط ديالي ) ولا يوصل حتال للباج واخا تكبر وتشيع غاتبقا مخبية عليه .. عالم هاد الناس حتا فالفيرتيال مبدل باقي هذا واحل مع الأسماء ديال "Ahmâd'ôx rofix" و "Amîn' X Jôckér" ودكشي .. كيتعنبو على وحدة دايرة "Fâtix'ah Méryôùla" ... وكيعرفو غا أجوتي سبريمي أونفويي ان ميساج وكازا بالفيزا والباجات ديال الوداد والراجا .. من المستبعد جدا بحال هذا غايقلب على إنشكاين ولا زحيليكر ولا بعض الشخصيات بحال نجيب المختاري وإسلام جاويش ... العالم لي عايشين فيه هوما ماشي زعما انا كنقول بعيد منهم بالعكس حناا متعايشين معاهم كل نهار وكنتعاملو معاهم .. الفرق بين العوالم هوما الأفكار يمكن نتا متقدرش تلوح بلاستيكة جنب البركاصة ولكن هو طززز عادي وملي كنقول عادي را عاد بالو نيت عادي ماشي حسيفة ولا شي لعبة ... ولا هضرتي معاه عادي يضور فك حيت حنا كلنا مربيين فينا واحد النزعة ديال مكنبغيو حد ينصحنا .. حيت كتجينا بحال نوع من النقص ..
المغرب مفرق وماشي كلشي بحال بحال .. وهذا هو أكبر قاالب ساارح معانا .. حيت على قد ما الاختلاف رحمة .. على قد مكيكرهوك هاد الأنواع عندنا فمعنى الاختلاف ..