الموت الرحيم

السلام عليكم .. !

تخايل راسك مريح فالدار ما بيك ماعليك فرعاتك البطالة والازمة قلتي نوض نتحرك شوية

خرجتي ونتا غادي كاتمشا جا سكايري غادي بطوموبيل دخل فيك طحتي .. جات الاسعاف داتك للسبيطار

خونا السكايري علق . المهم دازت سيمانة ونتا باقي كومة والدار مازال عندهم امل فالله انك تنوض دازت شهر 3 شهر 5 شهر

6 شهر عام ونتا مازال كوما ماعرفوك واش حي ولا ميت ! دازت ليام جاو الاطباء عند واليديك قالولهم بلي حالتك

ميؤوس منها وكاين حل واحد هو تكمل العلاج برا عالله تعيش واخا الاحتمال صغير ..

باك تصدم ماعرف باش تبلا شاف ولدو غايموت وهو مقودة عليه واصلالو للعضم ماعندو باش يصوفيه

يالله مكافي معاكم ب 4 . المهم باع شي قطعة دالارض مالورث دالواليدين وزاد تسلف وتكلف باش

يجمعلك شوية فلوس باش تعالج ! هي هاديك سيفطوك نتا ومك نتا مازال كومة عالله تفيق وتبرا

.. المهم دازت الايام الفلوس لي عطا باك لمك غادا وكاتقاضا ونتا باقي مافقتي من الكومة المهم

تقاضاو الفلوس ومك عيطات لمك قالها راني كاع البيبان دقيتهم المرة اللولة تا من الخدمة راه جراو عليا ..

مك الواليد ديالك بحالا ضربها بخنجر قطعات عليه وبقت تاتبكي دازت يوماين قالت للطبيب على الحالة ديالكم

وزاوكاتو ياكما يتعامل .. المهم الطبيب مابغاش مك كاتشوفك كاضيع وماعندها باش تنفعك بقات مريحة

معاك فالبيت تادخلات عليها واحد الممرضة وطلبات منها دوي معاها فواحد البيت ! المهم دخلات وهي تقولها هاد الجملة

-انا امادام سمعت الحوار بينك وبين الطبيب لي مكلف بولدك وديجا سمعت منهم بلي حالتو

صعيبة والعلاج باقي طويل يوصل تال 10 سنين والكلفة غاتطلع وشوف تشوف واش يعيش ولالا

.. ومن خلال ما استنتجت نتوما حالتكم ضعيفة وماتقدوش على هاد المصاريف كاملة وانا غانقتارح عليك واحد الحل لي هو كالتالي

.. ولدك دابا معدب ومعدبكوم معاه والاحتمالات باش يعيش ضعيفة

.. اش بانلك نتدخل انا وننقصلو من كمية الاوكسيجين لي كاتعطالو

تا يتخنق ويموت ويرتاح ويريحكم معاه ! مك سمعات يموت وهي تنقز

صفي تخلعات ولكن ماعنددهاش حل اخر واخا رفضات الفكرة فاللول .. !

المهم اسيادنا انا بغيت نحطكم فالصورة ديال هادشي علاش بغيت نكتب 

وهاد الاقتراح لي عطاتو ديك الممرضة للام هو ما يسمى بالموت الرحيم/القتل الرحيم او L‘EUTHANASIE بلغة الكفار !

هاد العملية الهدف ديالها هو انهاء حياة شخص باش يخففو من

الالم ديالو والعداب ديالو وغالبا تا كيتقطعو كاع الحلول كيبقا هو الاخير .

وهاد العملية عندنا حنا المسلمين محرمة حيت الله قالك لا تقتلوا النفس بغير

حق وحيت كيقولك الله بوحدو لي منحقو يسلب لشي واحد حياتو .. وحتى القانون المغربي

كيمنع هادشي وكيعتبرو جريمة كيتعاقب لي حصل دايرها

... وراه منوض بلبالة حيت تا جمعيات حقوق الانسان ماحاملينهاش حيت كيقولو

بلي مامنحقناش نحرمو الانسان من اهم الحقوق فحياتو لي هو الحق فالحياة .

هاد اللعيبة كاتقسم لثلالثى انواع : - الموت الرحيم الطوعي لي كاتكون

بالموافقة ديال الشخص المعني بالموت يعني بالادن ديالو بحالا كاتعاونو ينتاحر ويرتاح

-الموت الرحيم غير الطوعي فاش ماكاتكونش الموافقة دالمعني بالامر متوفرة بحال فحالة الكومة او الحالة ديال الاجهاض .

-الموت الرحيم القسري هادا فاش كيكون المعني بالامر رافض الفكرة دانهم يقتلوه ولكن كيتطبق صحة عليه
كل هاد الانواع غير قانونية ماعدا القتل الرحيم الطوعي لي مسموح بيه فبلجيكا
هولاندا سويسرا ومؤخرا كندا ونايض عليه الصداع فالبرلمان الالماني بين مؤيدين ومعارضين ! وكاينين ناس مختصين فهاد القتل اي ان المهمة ديالو هي يقتل بنادم بشكل مريحاما ينقصلو كمية الاوكسيجين او كمية الدواء لي كيستهلكها ولا يحيدلو شي لعيبة بحال السيروم الخ